Yo‘l harakati qoidalarini tartibga solish - shar’iy siyosat mahsuli

Yo‘l harakati qoidalarini tartibga solish - shar’iy siyosat mahsuli

Diniy olim Mubashshir Ahmad domla yo‘l harakati qoidalariga oid bahslar yuzasidan o‘z munosabatini bildirdi. Shuni sizlar bilan ulashgim keldi:

“Shar’iy siyosat - shariatda dalili yo‘q masalalarni hokim tomonidan jamiyatga manfaatni jalb qilish va zararni daf etishni o‘ylab joriy qilgan farmon yo hukmidir va unga rioya qilish vojib sanaladi.  

Masalan, svetofor qoidalari, o‘q chiziqni bosmaslik va tezlikni oshirmaslik inson hayoti yo sog‘ligini saqlab qolish uchun joriy qilingan. Binobarin bu ishlar jamiyatga foyda keltiradi yo zararni daf qiladi.  

Garchi bu qoidalar yangi paydo bo‘lgani uchun Qur’on va Sunnatda sarih va ravshan dalilga ega bo‘lmasa-da, ammo bu ikki manbadan olingan qoidalar ichida "manfaatni jalb qilish yoki zararni daf etish" ham mavjud bo‘lgani sababli, bu qoidalarga rioya qilish vojib bo‘ladi.  

Endi ana shu qoidalarni buzganlarni mas’ul jihatlarga yetkazish mavzusiga kelsak, qadimda islom diyorida muhtasiblik va ihtisob ishlari joriy qilingan.  

Muhtasibning vazifasi jumladan joriy hukm va qoidalar xalq tomonidan qanday bajarilayotganini nazorat qilishni va huquqi berilgan bo‘lsa hatto jazolashni o‘z ichiga olgan.  Binobarin hozirgi holatimizda yo‘l harakati qoidalariga rioya etmayotganlarni suratga olib, tegishli jihatlarga yuborayotgan kishilarni ana shu muhtasiblarga o‘xshatsak bo‘ladi.  

Chunki ular itoat etilishi kerak bo‘lgan qoidabuzarliklar haqida xabar berishmoqda. Buni qonun chiqaruvchi jihat joriy qilgan va ularni bu ishlarini qo‘llab-quvvatlaydi.  

Agar haqlari yo‘q va qonuniy bo‘lmagan ishlarni yetkazishsa, ya’ni shariatda buyurilmagan yoki hokim amr etmagan ishlarda ayg‘oqchilik qilishsa, u holda xoin deya atalishlari mumkin.  

Mavzuni yaxshilab o‘rganmoqchi bo‘lganlar "Shar’iy siyosat" va "Hisba va muhtasiblik" mavzulariga murojaat qilsinlar”.

Post tugadi.